先有國內房地產巨企恒大未能如期繳付利息，近日另一百強房企之一既花樣年亦都爆債務違約。兩間企業嘅股票，債券閒閒地今年蒸發8成。就算你無佢地嘅股票，MPF揸左人民幣或者亞洲債券基金又會唔會瀨野？
比較有直接關係嘅會係人民幣債券，因為人民幣債券基金會買啲以人民幣計算嘅大型企業債，而最普遍嘅就係銀行債，當中亦都會涉及內房債。不過佢地投資嘅都係Investment Grade級別嘅債券，去到恒大或者花樣年呢啲Speculative Grade級別嘅Junk Bond，基本上掂都唔會掂。相反，人民幣自上年年中開始走強，人民幣債券亦因此水漲船高，成為債券類別表現最佳嘅MPF。
至於亞洲債券，其實就同恆大，花樣年呢啲國內企業無咩關係，事關亞洲債券都係投資由政府或者中央銀行發行嘅債務證券，根本唔會擺錢喺其他地方，所以相對安全。但係由於通漲比預期將維持更長時間，covid delta 變種，而且中國經濟放緩，亞洲債券今年表現未如理想，4隻亞洲債券內有一半近一年回報見紅。
所以結論就係恒大爆煲，唔關你事（除非你有恒大股票或者地產項目）。即使你買左MPF債券基金，你都唔需要為恒大埋單。而且如果你獨具慧眼咁揸住人民幣債券，你仲可以ride on人仔升浪。
備注﹕
i. 只計算較高回報的基金單位
資料來源﹕積金局網頁，Yahoo Finance
