價錢收費，永遠係消費者選擇產品其中一個主要嘅考慮。喺強積金裡面，你可能淨係會睇回報而唔睇收費。呢個情況係絕對正常，因為所有收費已經喺回報上面反映。所以基本上大部分人係基於回報嚟選擇佢地嘅強積金組合。
咁係咪即係基金開支完全無參考價值，又唔係噃。假設你想穩陣，你可能諗緊揀保證基金定係保守基金。你以為保證基金無死啦，因為一定唔會輸。點知睇吓個基金開支原來保證基金平均要食你1.87%，而保守基金只係0.77%。咁即係你隻保證基金贏嘅差唔多都落咗其他人袋，可能就影響到你之後嘅決定。
同時，開支比率大都偏向穩定，而基金表現變動性較高，所以揀隻平嘅強積金點都穩陣啲。亦都係因為咁，政府近期大力推廣「預設投資策略」，佢其中一個特點就係收費有上限，變相幫你開支封頂。
當我地比較唔同營辦商嘅基金收費，一定係比較同種類嘅基金。你唔會用H記嘅股票基金收費同M記嘅債券基金收費比較。而收費貴開支平就喺咪等如表現唔好，呢個又未必一定。我地即刻睇吓最平嘅3隻強積金表現如何。
1. 中銀保誠我的人民幣及港元貨幣市場基金
基金開支﹕0.39%
5年年均回報﹕2.79%
排名﹕第2位 (貨幣市場基金基金總數﹕8)
2. 中銀保誠我的強積金保守基金
基金開支﹕0.41%
5年年均回報﹕0.27%
排名﹕第22位 (保守基金基金總數﹕27)
3. 新地景順強積金保守基金
基金開支﹕0.57%
5年年均回報﹕0.61%
排名﹕第6位 (保守基金基金總數﹕27)
資料來源﹕積金局網頁
