過去一年(08/2020-07/2021)，美國三大股票指數繼續屢創新高(標普500 +34.36%)，歐洲指數(歐洲斯托克50 +28.83%)亦緊隨其後，唯獨中港指數近期跌到阿媽都唔認得(恆生指數 +5.5%, 上証綜合 +2.91%)。當你同你隔離嗰Friend呻你無買美股MPF笨咗嗰陣，點知你隔離嗰個好愕然咁回你﹕「吓?!我個MPF裡面無得揀美股㗎喎?」嗰刻你可能仲以為係佢無知，點知原來幸福真係並唔係必然，有啲MPF計劃真係無投資美股。
係芸芸MPF基金裡面，股票基金嘅總數有144隻。而只投資美國股市嘅得嗰11隻*。當中匯豐，恒生(其實即係匯豐嗰隻)，友邦各佔2隻。東亞，宏利，中銀保誠，萬全同信安各有1隻。較為意外嘅係永明竟然係無美股MPF。而去年美股基金大致上嘅回報都超過3成，其中匯豐，恒生同宏利嘅回報更加高達36%。
而啱啱出嘅績金局年報亦指出投資港股MPF嘅資產竟然係美股嘅3倍。呢個數據可以反映幾個可能性
1. 普遍人看好港股前景
2. 普遍人以前攞左係港股一直無郁
3. 部分人想轉去美股但係無得轉…大家可以自己諗吓。
如果你供緊嗰個計劃有得揀美股，咁恭喜哂你。但係如果你屬於無得揀嗰邊，你亦無須要急於轉會。事關歐洲股票基金同環球股票基金其實同期都有平均3成回報，同美股其實唔係差得好遠。而你亦都唔知將來發生咩事，美股仲可以升到去邊，話唔定幾時縮表（縮減購債規模）同通脹可以令局勢瞬間急轉直下。當然MPF計劃裡面多一個選擇點都好啲，但喺如果你嗰個MPF計劃裡面嘅基金係每個類別(即各地區股票，債券及保守基金)一向比其他營辦商好，只係無咗美股基金，其實一動不如一靜。關鍵反而係定期review同rebalance，係升/跌市尋求最佳組合!
咁當你個MPF計劃淨係得中港股票嘅exposure，無歐美及甚至環球股票基金，唔洗講你都識點做啦!
*11隻美股強積金只計算淨投資美股基金
