1. MPF跑赢通漲?!
喺上個禮拜出爐嘅積金局年報，其中嘅一大亮點就係由嚿年4月去到今年3月，MPF計劃嘅回報有成28%！睇番過去20年，今年升幅只係第2高，但其實過往都有試過跌得甘嘅時候，例如喺2009年金融風暴都跌超過25%。所以其實MPF都係要睇長線，而自MPF成立以嚟拉勻嘅長期回報就有4.9%，高過1.8%通漲率！唔知大家戶口升幅又有冇高過4.9%呢一個數字呢？
2.其實有幾多人用MPF扣稅?
截至2021年3月，全港有53,000人開設咗可扣稅自願性供款戶口(TVC)，以供款戶口超過4.3百萬計算，只有1.2%嘅人使用TVC扣稅。從數字可以見到，打工仔對使用MPF作為扣稅工具反應不太熱烈，反而多數人一般都傾向以延期年金扣稅。可能MPF嘅回報同穩定性給予人感覺不如延期年金，希望A.I.科技能夠令現狀有所改變。
3.有錢人唔用懶人基金!
24%嘅戶口投資喺預設投資策略成分基金(懶人基金)，睇落好似唔錯，4個戶口有1個用懶人基金。但以總資產計算，預設投資策略成分基金只佔總資產嘅6.2%，反映投資懶人基金嘅賬戶多數資產規模較細。
4.高風險類別基金最受歡迎??
接近8成MPF嘅資產都係投資喺股票基金同混合資產基金入邊，小編做咗一個市場市場調查（問咗三個人），佢哋普遍都覺得MPF賺得少，所以訓身擺晒落去高風險基金度，所以話，多人投資高風險又喺咪即係代表佢哋承受到呢啲高風險呢？又或者佢哋真係知道自己揀咗咩類別呢？
5.MPF入面最多人揀嘅竟然喺香港股票?!!
年報指出，36%MPF資產投資喺香港股票基金，對比屢創歷史新高嘅美國及歐洲只佔12%同7%。如此顯著嘅差距並非代表打工仔偏愛港股，而係每個強積金計劃必然會有港股基金，相反少過一半嘅受託人有提供美股嘅MPF選擇。咁如果我供緊嘅強積金計劃無美股又應該點揀呢?
總括而言，MPF今年成績真係唔錯，而積金局為超過100,000名僱員拎返接近$2億嘅拖欠供款，表現亦相當稱職。畢竟打工仔嘅MPF都係佢地嘅辛苦錢。希望嚟緊呢幾年MPF可以繼續Keep住個勢，再創新高。
