係以前，當你轉工嘅時候，你一定會收到一本超厚嘅書，你唔會打開裡面嚟睇。你淨係知道，裡面有好多圖同數目字令你覺得好煩，仲有好多詞語你都唔知佢up咩野。你唯一知道嘅係，呢本野講啲有關MPF嘅野。佢叫做《強積金計劃說明書》。而你可能覺得佢嘅唯一用處，就係攞嚟墊臺食飯。結果浪費又唔環保。
作為一個繁忙嘅打工仔，基本上你唔會嘥時間去睇一本野閒閒地7/80頁嘅說明書。於是積金局要求營辦商將呢本《強積金計劃說明書》，由今年6月30日開始出一份不超過8頁的簡化版，叫做《主要計劃資料文件》。內容包括相關強積金計劃的主要資料，無哂技術或法律用語，以大量圖表解釋內容，用劃一的內容編排次序，如果你想了解多啲相關內容，仲有QR Code比你去掃去有關頁面。
積金局用心良苦，希望普羅大眾對自己嘅MPF參與更多。但係，就算係你最鍾意嘅遊戲捉Pokemon，如果要你睇一份８頁嘅說明書，你都未必會花心機睇，你最多都係問你身邊嘅朋友本說明書有無啲野有用。因此推出簡化版成效有待驗證，如果再規定營辦商加啲有趣短片講解呢8頁紙，又或者再放多啲宣傳，話俾市民聽而家成件事容易左好多，咁可能事半功倍。不過可以肯定嘅係，積金局不斷革新強積金平台，目的都係希望打工仔更容易同有效咁打理自己個MPF。
