強積金計劃基金平均回報，即係計劃內基金嘅總回報除以基金數目。
如果以平均回報嚟睇強積金計劃，【BCT（強積金）行業計劃】以-12.17%排列榜首。而【交通銀行愉盈退休強積金計劃】以-16.20%敬陪末座。但係揀強積金計劃，千祈唔好就咁睇平均回報。
好似今年咁，股市跌到柒彩。一啲計劃如果有多隻股票基金，平均回報自然被拉低，以【BCT（強積金）行業計劃】為例，基金數目只有12隻，而股票基金數目只係有3隻，股市影響較細。相反【信安強積金計劃800系列】及【友邦強積金優選計劃】，基金數目分別有19同23隻，其中股票基金數目亦都有6隻及9隻，對股票市場郁動較為敏感，因此平均回報能夠名列前茅更加係難能可貴。
其實，平均回報固然值得參考，但係最好加埋基金數目嚟睇。而且基本上你唔會將你啲錢平均放入每一隻基金裡面。你至多會揀3至4隻基金。因此，比較強積金計劃，睇吓有幾多基金俾你揀，同埋基金表現係咪比同類型基金好，反而更加實際。
