每一間強積金總有佢自己嘅明星強積金，最受人歡迎，最多人會擺錢入去。我地就睇下每間營辦商最有規模嗰隻強積金表現如何。
唔難發現，多數計劃裡面最受歡迎嘅都係香港股票基金或者係增長基金。但係，多數人揀未必就代表表現最好。恆指呢五年一直跑輸其他指數都幾多，香港股票基金自然亦都無運行，而增長基金就相對比較穩陣，因為佢混合資產嘅特牲，表現可以話係不過不失。
比較值得留意嘅係宏利，永明同萬全。宏利嘅明星基金「宏利MPF康健護理基金」喺芸芸嘅MPF表現嚟講相當突出，就算喺今年跌到阿媽都唔認得嘅市況下仍然差唔多持平。而最難得就係宏利嘅客識得擺錢落呢隻基金度，反映公司本身推廣呢隻基金非常成功。睇番永明，佢嘅明星基金「永明強積金香港股票基金」其實喺香港股票基金類別表現亦都唔錯，已經跑贏多數對手，奈何嗰市唔就，你有幾outperform恆指都無用，最後都輸其他指數一條街。而萬全嘅「萬全美國股票基金」就真係無野可以挑剔，萬全嘅客非常醒目，一注獨得，五年增長接近7成。
所以，真係唔好人買我就買，最緊要不時審視自己嘅風險接受程度，留意多啲強積金嘅新聞，做個精明投資者。
備註﹕
i. 若該基金含有不同單位，表現只計算較高回報的基金單位
ii. 若營辦商提供不同強積金計劃，表現只計算當中規模最大嘅基金
