尋日睇完積金局第2季(即係2021年4-6月)嘅季報，不難發現按季股票基金及混合資產基金嘅NAV(資產淨值)都有增長(7.3%及4.6%),反觀其他資產類別包括保守基金，保證基金同債券基金嘅NAV就錄得輕微跌幅。喺同期各資產價格沒有下跌嘅前提下，反映港人轉向進取，放棄防守型資產而投資涉及股票成份嘅MPF。
而更深入觀察一點，可以睇到打工仔愛港嘅精神，投資香港股票MPF竟然超過其他地區嘅總和。結果「可能」反映大部分人都對香港後市比其他地區樂觀。希望遲啲每個計劃都有多啲唔同地區嘅股票MPF選擇，不過呢樣就要靠各MPF營辦單位努力了。
總括而言積金局第2季做得唔錯，例如MPF總資產有3.4%淨回報，多左3萬人用佢地推出嘅「懶人基金」，而且又多左2萬人供「可扣稅自願性供款」。
但係其實MPF呢個系統仲可以有好多改善空間，首先就係抵銷遣散費同長期服務金上季仍然有成多過16億，其實都真係幾無奈，退休或者比人遣散都仲要俾僱主食一筆。積金局應該儘快取消強積金對沖，令到打工仔退休更有保障。
至於以永久離港為由提取MPF嘅金額有持續上升趨勢，超過20億港元，以每宗個案計算，平均提取26萬，比去年同季上升58%!不過再次提醒用BNO係不足夠證明永久離港的。
資料來源:積金局網頁
